环球第一财经

成也「Supra」、败也「Supra」

更新时间:2021-03-29 16:00:22

GR Supra

成也「Supra」、败也「Supra」



相隔差不多20年同时亦係一部非常令人注目嘅车款- 全新 Toyota GR Supra 终于抵达。相信有唔少嘅车迷都好渴望想知呢部「德日混血儿」表现到底如何。


由 Toyota(丰田)同 BMW(宝马)共同合作嘅 GR Supra 同 BMW 嘅 Z4可以算係孖生姐妹,因为包括引擎(B58)、底盘同波箱都係宝马出品而且共用,不过外型同setting 就各有各做。以外观设计为例除咗两只侧镜之外,绝大部分都係由Toyota 设计,所以外观上 Z4 同 GR Supra 完全唔相同。个人觉得新车外观设计得好靓仔,好似个凹字型车顶设计,仲好有Toyota 经典跑2000GT 风格,不得不讚赏设计师喺细节上所花嘅心思。不过,车身都有失望嘅地方,就係好多入风位都係假而且完全密封,所以係纯粹装饰用途。


凹字型车顶除咗係空气动力学设计之余,仲係对经典跑2000GT作致敬。


GR Supra行货入口新车,清一色属于3.0版,2.0版暂时未有消息。卖 GR Supra 3.0车价79万8,Launch Edition卖81万8,而Launch Edition特点係有专用19吋合金軨、红色侧镜仲有红黑双色笼,另外拣Phantom Matte Gray车色身就要再加3万,所以GR Supra 新车价最高可以达84万8!


上面提到GR Supra 採用嚟自BMW 嘅 B58 引擎,而B58 引擎在 BMW 有咩车款用过呢?有 M2 、有335i,所以对BMW 有认识嘅车迷对呢副机器绝对唔会陌生。 GR Supra 马力输出有 340 匹、峰值扭力就有 500 Nm,配合8前速自动波箱0 - 100 公里加速时间係 4.3 秒,而使用同一部机器嘅 Z4 0 - 100 公里加速时间就要 4.5 秒,所以这部车的加速时间快咗 0.2 秒。


用得上B58 自然会想起连 M2 Competition 都用嘅 S58 引擎,如果将来有机会出现喺GR Supra ,呢部车不得了啊!


一跳入车厢,相信有很多车迷都同我感觉一样,觉得设计同现时 BMW 非常相似,原因係GR Supra 车入面大部分零件都嚟自 BMW,大至中控屏幕、小至两边嘅门把都係源自 BMW 设计。有车迷会对呢个举动有意见,不过对于我嚟讲其实 BMW 嘅设计喺一部Toyota 车上面又唔係一件坏事,大家可以谂谂现时Toyota 车嘅内笼设计究竟有没有一部可以比得上新 Supra 咁靓、豪华呢?第一次坐上车嘅时候会觉得舒服,感觉所有嘢都好乾净同有诚意,至起码不会觉得中控屏幕是后期加上去咁奇怪。


车入面嘅设计引起唔少争议,不过相比起Toyota 自家製嘅车厢设计,BMW 确实係略高一班。


相信有好多车迷会关心GR Supra 嘅过弯表现如何,试车后发现原装避震唔够硬净,高速过弯时会有少少推头嘅情况出现,但因为避震比较软嘅关係,相对地舒适度提升,所以如果当佢係日常会用嘅车,原装避震已经够用、非常之好,但如果你会进取啲过弯,就需要改装避震系统。


另一样令车迷门都注意到嘅係 GR Supra 只有8前速嘅自动波箱可供选择,手波欠奉。我知道很多Supra 迷得悉这消息之后,对呢架车嘅印象打晒折扣,但用过呢个嚟自宝马嘅波箱,情况又唔係想像中咁差,不论Upshift 或 Downshift 表现都非常好,唔会有迟缓嘅感觉。


使用正常模式下,新车反应係可以接受,軚盘唔会觉得很轻而且軚感係有,但转用Sport 模式之后反应就会变到好敏锐,喉声更大之余軚感比之前更加重。


去到清水湾比较窄同多弯嘅路段会发现GR Supra 有一个大问题而令部车唔可以係山路上有好好嘅表现。佢嘅2波尾段力量实在太多,但转用3波后要等得时间太耐当刚刚转上去时力量又太少,所以会觉得「2波尾好劲,3波头太弱」嘅情况,所以我个人认为如果係山路上新Supra 嘅表现会不及同厂嘅 Toyota 86好,不过GR Supra 如果以巡航计,我相信86表现就不及新车。


如果山路或高速公路,个人认为GR Supra 比较适合后者使用。


其实以一部直六双门跑车嚟讲,GR Supra 嘅性能表现已经相当唔错,我明白上一代 Supra 直到今代 Supra 相距差不多有 20 年时间,各位 Supra 迷对佢嘅高期望都合理,但如果你期待GR Supra 係一部很有爆炸性、很有高科技性能表现嘅神级跑车,可能新车就未必可以畀你。「Supra」 这个名字对一部新世代嘅直六双门跑车来讲实在係太沉重…


新车车头都好长,啱啱上车要少少时候适应。


车身上最大疑惑就係众多嘅入风位竟然密封。


GR Supra 规格

引擎:2, 998c.c. 直6 涡轮增压引擎

马力:340hp/5,000 - 6,500 rpm

扭力:500Nm/ 1,600 - 4,500 rpm

传动:8前速自动波

驱动:前置引擎、尾驱

车身(长x阔x高):4,380 x 1,865 x 1,295mm

轴距:2,470mm

车重:1,520kg

售价:$798,000起

查询:Crown Motors(2884 7999)


Text: Daniel

版权声明:转载此文是出于传递更多信息之目的。若有来源标注错误或侵犯了您的合法权益,请作者持权属证明与本网联系,我们将及时更正、删除,谢谢您的支持与理解。