豪到尽 Land Rover Range Rover 5.0 P525 LWB Autobiography

未睇内文、未睇相片，单睇「Land Rover Range Rover 5.0 P525 LWB Autobiography」呢个车名就已经feel到呢部Range Rover够晒巴闭，十足达官贵人啲公职名水蛇春咁长。Range Rover贵为顶级旗舰车型，2012年推出至今虽然已有7年，但厂方冇咁快推出新款住，眼前嘅所谓新款，其实係facelift版本，不过呢个facelift版唔寻常，比以往嘅Range Rover更先进、更豪华，以SUV嚟讲，佢真係豪到尽！

换上新鬼面罩同LED头灯，令外观都有返啲新意。

前辈级人马

早喺十几廿年前，欧洲豪华SUV仍然係萌芽阶段，条街见到嘅车款真係十只手指数得晒。今时今日？两间车厂加埋都唔只十款啦！不过讲到老资格，Range Rover一定係老前辈！早喺1970年、尚未有「SUV」呢个称呼时已经面世，当年係称呼为「设备豪华嘅越野车」！多年来Range Rover都係同级最强、最豪，根本冇对手！不过随住SUV市场愈做愈大，Range Rover都开始有竞争对手，当然唔会係喽啰对手啦，佢嘅对手已经係Bentley Bentayga同Rolls Royce Cullinan！无错，已经去到极上级。

今代Range Rover初推出时，Bentayga同Cullinan都未有初稿，Range Rover一出可以话天下无敌，刚推出嘅Facelift版就唔同，前前后后都係对手，所以就算係facelift都唔可以hea搞。

新尾灯同车身成一体化，非常靓仔！Range Rover都唔再老饼。

长阵够气势

代理都深明Range Rover唔係普通SUV，普通人亦都唔会买，与其引入一个普通版，不如引入顶级到尽、车身最大嘅长阵版本，所以车名「Range Rover 5.0 P525 LWB Autobiography」就有LWB（Long Wheel Base）字眼。现时轴距达到3,120mm，车长更达至5,200mm水平，比Bentayga更大部，仅次Cullinan。有咁嘅车长先有足够气势，面对身价更贵嘅对手都毫不示弱。来港嘅facelift版只有长阵版供应外，亦都有改头换面，包括新泵把同新嘅头、尾灯设计，当中头灯用咗「Pixel-laser LED」系统，可增强照明效果外，仲可以因应即时环境关闭部分灯组，避免产生过度强光影响对头车。

长阵版车身达到5,200mm，而轴距都有3,120mm，仲大部过Bentley Bentayga。

极致好享受

有成3,120mm轴距，除咗令Range Rover嘅外观极具霸气，更重要係长阵版嘅「生存意义」！「生存意义」？咪就係为车厢带嚟前所未有嘅空间感啰！现时Range Rover后座膝部空间达到1,206mm，比以往增加186mm，座椅喺正常坐姿下，乘客轻易就可以翘脚坐，而且仲新加入躺卧模式，椅背可以倾斜40度，配合埋活动脚踏同小腿垫，令后座乘坐感媲美Rolls Royce或Bentley等极上级房车！后座垫唔单只有冷、暖功能，更有埋热石按摩同MERIDIAN个人娱乐影音系统，真係舒服过我个床。

我坐喺后座自然左顾右盼咁睇吓仲有咩玩，惊觉后座嘅手枕竟然係电动升降及电动开关杯架！操作更不费吹灰之力！此外，后座门唔单只可以操作座位移动，竟然被我发现连车内阅读灯都有得拣「阅读电脑」或「阅读书本」，刁钻到咁都係想后座贵宾唔好伤眼。

后座可以调校至躺卧式，有小腿垫、脚踏及电动手枕，豪过好多顶级房车。

手枕内藏遥控器，前方係真皮背板嘅小镜，女士至啱用。

门边嘅按钮唔单只可以操作电窗及窗帘，连照明系统都有阅读书本同电脑两种选择。

更新中控台

进行facelift行动嘅，又点只外表同后座？坐入前座都有耳目一新感觉，成份中控台大更新，套用咗Velar嘅设计，两个10吋高解像touch mon.操作全车大部分系统，最特别係有温度显示嘅冷气扭掣好似同个mon.一体成形咁，令中控台好hi tech！此外，8速波箱仍採用旋钮式操作，熄车就会自动收入中槽，配合按钮排列得好整齐嘅全地形反应系统，令波箱台表面简洁。錶板方面，採用全彩mon.设计，显示极多行车资讯，亦可随用家喜好自订显示模式。

中控台引用Velar嘅靓仔设计，主要由两个10吋mon.组成，可操作绝大部分系统。

多15匹马力

动力方面，Facelift版Range Rover都有更新，虽然沿用以往嘅5.0公升V8 supercharged引擎，但马力就有15匹进账，达到525匹马力，配合埋低至2,500rpm就有63.8kgm最大扭力，以及8速波箱，令眼前呢部长阵版本Range Rover，都可以5.5秒完成0-100km/h加速！5.5秒唔快？当你知道呢部车净车重都达到2,451kg嘅时候，可能会收返所有质疑。

由于Range Rover已备有第二代全地形反应系统，一方面可以由用家自己调节至唔同行车模式去切合唔同地形，另一方面车身亦可以自动升降，笔者试过行驶高速公路，车身降至最低，有效令行车更稳定，唔似啲普通SUV咁，有过份车身倾侧。除咗试揸之外，有咁正嘅后座当然要一嚐做大老板嘅滋味，我先将座位调至躺卧模式，开启按摩功能及戴上无线耳筒，本以为可以享受一次帝王式车程，点知发觉可以供Range Rover平稳定速行车嘅路段太少，往往因为转弯、停灯位或凹凸路面而「冇觉好瞓」，唔係Range Rover有问题，而係路况太差了。

5.0公升V8 supercharged引擎多咗15匹马力，达到525匹。

8速波箱保留扭掣式设计，同Jaguar出品一样。

全车都用上高级喇叭，基本上靓声到好似演奏厅咁，但如果想再个人化一啲，都可以用无线耳筒。

Land Rover Range Rover 5.0 P525 LWB Autobiography Spec.

引擎：4,999c.c.V8 supercharged

马力：525ps/6,000-6,500rpm

扭力：63.8kgm/2,500-5,000rpm

传动：8前速自动、附+/-模式

车身：5,200 X 2,073 X 1,868(mm)

轴距：3,120mm

车重：2,451kg

0-100km/h：5.5秒

极速：225km/h

耗油：13.4L/100km

车价：$2,988,000起

查询：British Motors（2821 7147）

Text：Chris