新改款更抵玩-Ford KUGA

现今欧洲製SUV新车动辄都要卖接近40万，例如Volkswagen嘅Tiguan Sport 330新车卖紧$399,980。如果想你搵部车价平少少嘅SUV，韩国同车当然係一个选择，不过市场上其实仲有Ford KUGA可以提供到相宜车价，例如今次介绍由西班牙製造嘅新版KUGA Titanium 1.5 EcoBoost，车价只係$289,900，相当抵玩！

Facelift版KUGA新车售价$289,900，比同级欧洲对手平咗一大截。

革新变化

2018年Facelift KUGA改用咗新1.5公升EcoBoost Turbo引擎配6前速半自动波箱同智能四驱系统，马力输出有180匹，峰值扭力有240Nm，0至100km/h加速9.7秒。相比起Facelift前，虽然KUGA引擎容积少咗100c.c.（转款前1,596c.c.），不过马力输出係接近无变嘅180匹（转款前182匹）。

除咗引擎规格唔同，新版KUGA喺外型都有唔少转变，例如鬼面罩面积经过加大，有新LED日行灯、自动调节光束同角度嘅Bi-Xenon头灯同LED尾灯，配合新头尾泵把同17吋合金軨，新鲜感明显大增。车厢部分，新KUGA中控台亦焕然一新，当中最抢眼係中控台轻触式屏幕由之前4.2吋升级到8吋，而且SYNC 3智能蓝牙声控系统仲可以轻鬆操控车内电子设备，加上新三幅式軚盘、电子手掣同司机位10段式调校电动真皮櫈（需加$10,000），真係几吸引。

以价论车，新KUGA车厢设备应有尽有，Keyless Go、8吋中控台触控mon.同軚盘全部有齐。

实用度高

作为一部实用型SUV，KUGA车厢空间唔可以话好阔落，但就一定唔会窄，后坐要坐三个成年人绝对绰绰有余，加上椅背斜度啱啱好，又有天幕玻璃顶增加车厢开扬度，乘客一定坐得舒服之余压逼感又唔会大。买得SUV嘅车主仲会留意尾箱空间，KUGA尾箱容量当然有返咁上下，新车尾箱基本置物容量有456公升，而且喺有需要时仲可以将后排櫈向前放平，将尾箱容量扩大到1,615公升，方便摆放各类大型同长型物件。另外，新KUGA仲有脚踢感应尾门开关功能，等你拎住一袋二袋时唔怕冇手开尾门。

1.5公升 EcoBoost Turbo引擎配合6前速半自动波箱，最大马力输出有180匹。

軚感扎实

试车当日坐上KUGA司机位发现新车比其他SUV略高，就算将櫈嘅高度调较到最底，望出去车外面依然有高高在上感觉，睇位都算方便。不过正正因为车身略高，令到KUGA喺过弯时车身多咗倾侧。KUGA嘅避震机设定偏向中性，未算硬朗又唔算柔，整体而言有唔错舒适性之余，又唔会令新车操控变到好笨重。

新车嘅1.5公升EcoBoost引擎，喺低转时已经有唔错低扭，令新车有好好嘅起动同加速力，组合嘅6前速自动波箱，反应一啲都唔慢，完全唔似只係得1.5公升排气量引擎，但针冇两头利，KUGA喺5,000转打后动力会开始转弱。另外，值得一讚係KUGA电軚有好好嘅路面感，唔似其他品牌电軚会将路面资讯隔绝。

虽然KUGA喺2013年已经嚟咗，今次介绍嘅Facelift版亦未至于有由头到尾大转变，惊喜亦唔算大，但以一个咁平嘅车价就买到装备齐全嘅欧洲製SUV，你仲要求啲咩呢？

KUGA智能四驱系统，可以喺唔同路况自行调节前后轴扭力。

KUGA嘅车顶行李架，令新车多返份运动感。

新KUGA仲有其他装备係之前冇嘅，例如转波拨片同后泊镜头。

加$10,000就可以升级全车原厂真皮座椅，司机位仲包括10段式调校电动櫈。

全景天幕由前座一直延伸到后座，车顶空间亦都充足，压迫感大减。

后排座位放平之后，令尾箱空间由456公升增加到1,603公升。

2018 Ford KUGA Titanium 1.5 EcoBoost

引擎：1,498c.c. EcoBoost 涡轮增压

马力：180PS/6,000rpm

扭力：240Nm/1,600 - 5,000rpm

传动：6前速半自动波箱、附+/-模式

车身：4,524 X 1,838 X 1760(mm)

轴距：2,690mm

0-100km/h：9.7秒

油耗：13.5/100km

车价：$289,990起

查询：Future Motors（2820 4018）

Text: Daniel