环球第一财经

「究竟你係MPV定Van」 —Peugeot Rifter

更新时间:2021-03-31 12:13:15

小Van大变身 Peugeot Rifter

人话,汽车市场基本上只得两类车卖得,一係SUV,另一就係MPV。SUV受欢迎程度可以话比MPV更甚,SUV係「全地球」咁受欢迎,不论性别、年龄、国藉及肤色嘅人都锺意,反之MPV就唔係。MPV喺受到「地区性」欢迎,喺呢个弹丸之地就威,喺到欧洲,车厂甚至唔愿意为推出纯MPV车款,大多以「一鸡两味」,甚至「一鸡几味」登场,share同厂嘅轻型货车底盘就係最常见、最便捷嘅方法。

Peugeot呢个红极一时嘅法国品牌,廿年前个个都识206 GTI,但近年Peugeot喺市场只的Expert货Van叫好叫座,有冇SUV同MPV撑场?都有嘅,早前有部3008 SUV,成绩有目共睹吧。Peugeot有冇MPV可以喺卖?当然有,就係今次测试呢部Rifter。


去除Van味 

「Rifter」呢个名好陌生?又难怪,从来未听过呢,如果我话Partner呢?即时有啲印象啦!无错,其实Rifter係Partner嘅入替车款。1996年同属PSA集团嘅Citroen同Peugeot,就分别共用底盘同引擎,各自推出初代Citroen Berlingo同Peugeot Partner,而去到2008年,再次双双进化成第二代。去到2018年,第三代Berlingo上市,但Peugeot就冇再用Partner呢个名喇,改为Rifter,就係眼前呢部。咁Rifter又係一部点样嘅车呢?既然同以前嘅Partner有血源关係,就已经表明佢係一部货Van底子嘅MPV,亦预告咗佢嘅行车表现,以至车厢陈设都会好似货Van咁。

 

竟然冇电趟门

欧洲车厂推出MPV,多年嚟俾到我嘅感觉,我只会用一个字形容,就係「硬」。由于全部都係由货Van改建而成,所以车架同车体都用上好好嘅钢水,而车内嘅饰件以至座位设计,都用返货Van嘅基本配置。Rifter虽然已经由外表至内在都加入大量MPV化、甚至SUV化嘅设计,但一睇佢嘅七座位布局就知佢「本性难移」。点解咁讲?因为只有由货Van改造而成嘅MPV先会有Rifter偏高嘅地台,而且2+3+2座位布局全採用独立座椅,每一张都可以独立摺叠椅背,最后排两张更可以个别拆走,将最后一寸空间都腾出嚟,令平坦嘅尾箱更大。由于最后排坐得比较高,而且两旁就係后轮拱位置,所以乘坐空间同舒适性都只係一般,载小朋友就最适合,如果係成年人坐,最好当然係连中排都摺平,双脚伸直坐都得。Rifter后座门用咗悭位又方便嘅双趟门设计,不过绝对「儿童不宜」!唔係有咩18禁嘅嘢,而係一双趟门完全冇电动功能,小朋友难以开关之余,就算係成人,如果部车喺斜路,一样十分难搞。


虽然中排上车要小心控制开闩车门,但车厢内嘅舒适性同方便性都几高,真係似足一部MPV。例如喺前座背有摺叠小餐枱,根据唔少MPV用家嘅使用经验都一致讚好,尤其小朋友更加喜欢。此外,由于地台接近平坦又有后座冷气,其实整个乘坐空间舒适性都唔错,就算版本冇咗巨大嘅玻璃天窗,都有非常好嘅视觉空间,同最后排有颇大对比。如果转为前座乘客或驾驶者,更深深体会到Rifter嘅「MPV化工程」做得相当唔错,甚至比起车高级。





首先,放喺驾驶者眼前嘅軚盘形状与常见嘅唔同,椭圆形之余仲要粗身,握持手感好,有啲似揸方程式赛车。虽然錶板未用到显示屏,但中控台都有touch mon.,所有设定都可以简单搞掂。而比较有趣一点係Rifter嘅波箱,虽然採用一个相当小巧嘅扭掣,同埋又有电子泊车手掣,但由于Rifter喺欧洲係有棍波版本,所以预留咗一个相当巨型嘅波棍枱,连埋储物柜将前座狠狠地分隔开,视觉上係几有型,但就影响咗空间感。


引擎波箱都有惊喜

近年嘅细容积三缸引擎真係愈来愈普及,已经唔再局限喺细车仔上面,可以喺唔同车种上面都见到,跑车都用得啦,好似Rifter呢啲中小型七人车梗係冇问题啦!一打开头冚就可以见到相当小巧嘅1,199c.c.嘅三缸Turbo引擎,呢一个正正就係三缸引擎优点,细小、轻量,为输出带来低负担亦可增加车厢空间。引擎输出130匹马力及23.5kgm扭力,对于一部1,515kg车重嘅车嚟讲可谓合理,试车时载三个人游走飞鹅山一带山路,当然好气好力啦,但由于试车限制载三人,试唔到满座效果如何,但睇输出数值1,750rpm就有23.5kgm扭力,相信就算坐满七人上山都冇问题。试车嘅时候,我以为呢副三缸引擎会係全车最大卖点,但原来波箱都係精彩之处。Rifter用上8前速自动波,而且仲有埋軚盘加减拨片,如果用全自动模式驾驶,波箱反应都几快,基本上起步唔使一阵就已经连跳三、四个波段,只要均速行驶一小段路就已经用上五波或六波,非常明显係为悭油而设,如果想下下都用尽转数去加速或自已动手拖波,就最好揿个「M Mode」,全程由自己话事转波。

 




以一部货Van改造成MPV,Rifter已算做足本份,佢嘅驾驶感同乘坐感未必有车咁好、咁舒适,但亦正正因为佢係Van底子,车身扎实程度同尾箱空间真係好啲。如果车主仍然抱住一个「MPV係最好」嘅心态去买车,Rifter根本冇可能令你回心转意,因为驾驶Rifter、乘坐Rifter,以至操作Rifter嘅设备,都同你用惯用熟嘅车唔同,如果先入为主就会不自觉去比较。试试先book个时间试车,亲身感受完,再佢判断都未迟。

 

 

Peugeot Rifter Spec.

引擎:1,199c.c.直三Turbo

马力:130ps/5,500rpm

扭力:23.5kgm/1,750rpm

传动:8前速自动,附+/-模式

车身:4,753 X 1,848 X 1,880mm

轴距:2,975mm

车重:1,515kg

车价:$278,800

查询:2834 4233(法国汽车)


Text、Photo:Chris

版权声明:转载此文是出于传递更多信息之目的。若有来源标注错误或侵犯了您的合法权益,请作者持权属证明与本网联系,我们将及时更正、删除,谢谢您的支持与理解。